فیصل آباد (15 مئی 2025) ڈائریکٹر جنرل ایف ڈی اے محمد آصف چوہدری کی ہدایات پر غیرقانونی ہائوسنگ سکیموں کےخلاف گرینڈ آپریشن جاری ہے اس سلسلے میں ایف ڈ ی اے کی انفورسمنٹ ٹیم نے کارروائی کرتے ہوئے مختلف علاقوں میں چھ غیر قانونی ہائوسنگ سکیموں کے قیام کی کوشش ناکام بنا دی اور موقع پر ان کے دفاتر کو سر بمہر کرکے تعمیراتی ڈھانچوں کو مسمار کر دیا گیا۔ ان میں تین اضافی آبادیاں بھی شامل ہیں۔ تفصیلات کے مطابق ڈائریکٹر ٹائون پلاننگ اسماء محسن کی زیر نگرانی اسٹیٹ آفیسر انیب اسلم رندھاوا کی سربراہی میں ایف ڈی اے کی انفورسمنٹ ٹیم نے مختلف علاقوں کی انسپکشن کی تو چک نمبر239 ر ب کی اراضی پر پام سٹی، بلاسم ایونیو چک نمبر 238 ر ب میں ماڈل سٹی ii ایگزیکٹو بلاک، چک نمبر 258 میں تین اضافی آبادیوں کی آڑ میں ہائوسنگ سکیموں کے قیام کی کوشش کی جا رہی تھی جن کے خلاف اپریشن کر کے دفاتر کو سیل اور وہاں بعض تعمیراتی ڈھانچوں کو مسمار کر دیا گیا۔ ڈویلپرز کو تنبہہ کی گئی ہے کہ وہ تمام قانونی و محکمانہ تقاضے پورے کر کے ہائوسنگ سکیموں کی باقاعدہ منظوری حاصل کریں بصورت دیگر مزید خلاف ورزیوں پر قصورواروں کے خلاف فوجداری مقدمات بھی درج کرائےجا سکتے ہیں۔ ایف ڈی اے انتظامیہ کی طرف سے عوام الناس کو آگاہ کیا گیا ہے کہ وہ غیرقانونی ہائوسنگ سکیموں سے ہوشیار رہیں اور کسی بھی ہائوسنگ سکیم میں پلاٹ خریدنے یا سرمایہ کاری کرنے سے قبل ہائوسنگ سکیم کی قانونی حیثیت ضرور چیک کر لیں تاکہ بعد میں انہیں کسی قسم کی پریشانی یا مشکل پیش نہ آئے۔