فیصل آباد (17 مئی 2025) ڈائریکٹر جنرل ایف ڈی اے محمد آصف چوہدری کی ہدایات پر ایف ڈی اے کے زیر کنٹرول رہائشی کالونیوں اور کمرشل مارکیٹس میں تجاوزات کے خلاف باقاعدگی سے آپریشن جاری ہے اس سلسلے میں ایف ڈی اے کی اینٹی انکروچمنٹ ٹیم نے کارروائی کرتے ہوئے مدینہ ٹائون اور کچی آبادی چوہڑ ماجرا سے ہرقسم کی تجاوزات کا صفایا کر دیا اور تجاوزات میں استعمال ہونے والا سامان اٹھا کر قبضہ میں لے لیا گیا۔ تجاوزات میں ملوث آٹھ دکانداروں کے خلاف چالان سپیشل جوڈیشیل مجسٹریٹ کی عدالت میں بھجوا دیئے گئے۔ تفصیلات کے مطابق ڈائریکٹر اسٹیٹ مینجمنٹ ون جنید حسن منج کی زیر نگرانی اسٹیٹ آفیسر انیب اسلم رندھاوا کی سرپرستی میں ایف ڈی اے کی انکروچمنٹ ٹیم نے مختلف رہائشی کالونیوں اور کمرشل مارکیٹس میں انسپکشن کی تو مدینہ ٹائون میں محمدی چوک اور مین بازار جبکہ کچی آبادی چوہڑا ماجرا میں بعض دکانداروں نے کاروباری سامان رکھ کر عوامی راستوں کو روک رکھا تھا جس کے باعث شہریوں کو آمدورفت اور ٹریفک کے بہائو میں مشکل پیش آ رہی تھی ان دکانداروں کے خلاف کارروائی کرتے ہوئے سرکاری جگہوں و سٹرکوں پر رکھے گئے کاروباری سامان کو اٹھا کر قبضہ میں لے لیا گیا اور راستوں کو کلیئر کر کے آٹھ دکانداروں کے خلاف چالان سپیشل جوڈیشیل مجسٹریٹ کی عدالت کو بھجوا دیئے۔ ایف ڈی اے انتظامیہ کی طرف سے خبردار کیا گیا کہ دکاندار اپنی پراپرٹی کی حدود میں رہیں اور تجاوزات کر کے عوامی راستوں کو روکنے سے گریز کیاجائے بصورت دیگر باز نہ آنے پر قصورواروں کے خلاف فوجداری مقدمات بھی درج کرائے جاسکتے ہیں۔